आज की काण
अनिल सांगवान की :
फोटू : फोटू के नाम पे एक रूंढी खोल्ला की तस्वीर चेपे जा सा सारी हान | कोए बात हो जाओ फैड देन सी ऊह खोल्ला का फोटू ला देगा अक मार ल्यो इसकी धोक, जणू ते गुड्गामे आली माता हो या |
लोगिन : लोगिन ते भाई का साचा स आपणे नाम की ढाल ,कोए नकली सौदा नहीं | लोग-बाग़ प्रेम ते "लीला" भी कह दे सै इसने | दो लीले थे पहलम JL पे, पर दूसरा भाई जिसने "लील-२" कहया करते आजकल आमता कोणी याडे |
उदघोसना : "
जेळी आळा जाट"| बस उदघोसना में ऐ कहवे से, बाकि जेली ठाए कदे देख्या नहीं | पर हो सके से ऊह रूंढी आगे तूड़ा, ओबरे में ते जेली गेल काढ के गेरता हो | ज्या मारे
जेळी आळा जाट लिख रहया होगा | पहलम "जय किलकी टोल" भी लिख रहया था | पर आजकल जुकर किलकी टोल के नाम पे टट-पुन्जिये जोक आवे से, केरा उनते शर्मानते ने हटा दी या लैन |
आड़े नोट करन की बात या सै अक इसकी उदघोसना
हरे रंग में सै | बाकि लीले समझ तो तू गया इ होगा !
कार्यकलाप : इस मानस ने घुमन-फिरण का भोत शौक सै | हरयाना तो सारा गाह ऐ राख्या सै भाई ने, गेल पुरे दक्षिण भारत के भी चक्कर मार रहया सै | किसे जगह का नाम ले दो, टप देन सी कह्गा अक हाँ फलानी जगह फलाने की गाड़ी में हान्ड़ें थे | ख़ास बात या सै अक कदे भी अपनी गाडी का तेल कोणी फूके |
आजकल यु मानस ऑस्ट्रेलिया में "चुन" फूकन जा रहया सै |
राजनीती का करडा चस्कू सै | के मजाल एक खबर भी छूट ज्या हरयाने की | जो बात किसे ने नहीं बेरा हो, वा काढ ल्यावे है | हरयाना की राजनीती का इस्ते बड़ा खबरी कोणी JL पे |
सबते बड़ी खासियत सै मानस की, "इसका टेलेस्कोप" | एंटीना की ढाला ताणे रह से जमा | चेन्नई में बैठा-बैठा न्यू बता दे से अक आज पोपट के घरा २ डम्पर रोड़ी के उतर गे, आज उसकी तीसरी मंजिल का लेंटर पड्या, आज हूडा ने फलानी जगह मोटर-साइकिल चलायी आर डेह पड़ा, आज "लूसि लिऊ" ने फलाने के सुआ पोया, आदि-आदि |
बाकि मानस मजाकिया भोत सै | मजाक का कदे बुरा कोणी माने |